انت صح و هو صح !
اكبر نجاح لابليس انه عرف يقسم الكنيسة للطوائف ، وكل طائفة شعبها شايف
نفسه هو الصح ، هو صاحب الدم الازرق ، وهو الشعب الوحيد الذى يستحق الملكوت و
الباقى كفرة !
و بكدا ابليس عرف ينسى المؤمنين مهمتهم الاساسية وهى " اذهبوا الى العالم اجمع واكرزوا بالانجيل للخليقة كلها " مر 16: 15 الى انهم يخشوا فى صراع "مين الطائفة الصح ومين الطائفة الغلط ؟! " .
انت بتصلى وماسك ايد اخوك وبتنتهر ابليس ، وهو ماسك شمعة و واقف رافع ايده . انت صح وهو صح .
انت بتسبح بالجيتار و الدرامز ورافع ايدك وبتنطط ، وهو بيسبح بالمثلث و
الناقوس و واقف ثابت . انت صح وهو صح .
انت بترنم باللغة القبطية ( لغة بشرية ) ، و هو بيرنم باللغة العربية ( لغة
بشرية ) . انت صح وهو صح .
انت خدام كنيستك اسمهم شمامسه ، وهو خدام كنيسته اسمهم شيوخ . انت صح وهو
صح .
انت بتصلى فى مواعيد معينة و بطقوس معينة ، و هو بيصلى فى اى وقت ومن غير
طقوس . انت صح وهو صح .
انت مش راجعى عشان بتستخدم الزيت والبخور ، وهو مش كافر عشان مابيستخدمهمش
. انت صح وهو صح .
انت جوازك سليم ، وهو جوازه مش زنى . انت صح وهو صح .
انت بتصوم فى وقت معين و بتاكل بالزيت ، و هو بيصوم فى اى وقت و مابياكلش
بزيت . انت صح وهو صح .
انت طريقة تناولك ومعموديتك سليمة ، وهو طريقة معموديته وتناوله سليمة . انت
صح وهو صح .
من الاخر مافيش فى العبادة طريقة
صح وطريقة غلط .. العبادة حرية " حيث روح الرب هناك حرية. " 2 كو
3: 17 .
مافيش حاجة اسمها انا صح و الباقى
غلط وكافرة .
مافيش كنيسة اصلية و كنيسة مضروبة
. اى كنيسة بيت لربنا انما لو اتحولت لمكان مليان صراعات مبقتش كنيسة لان ربنا مش
موجود فيها .
الكاهن او القسيس اللى يقولك
ماتروحش اى كنيسة تانية غير كنيستك عشان المسيح مش موجود غير هنا . سيبك منه
الحوار معاه سخيف و زى مابيقول بولس الرسول فى 2 تي
2: 23 " والمباحثات
الغبية والسخيفة اجتنبها عالما انها تولّد خصومات.
"
الكنيسة اللى
تمنع ولادها من دخولهم الكنيسة تانى لمجرد انهم راحوا صلوا فى مكان تانى او اتجوزا
او اتعمدوا بطريقة تانية كنيسة المسيح سابها من زمان .
روح وصلى فى اى
كنيسة وصلى بالطريقة اللى تريحك مافيش صح وغلط .
الغلط والصح بيتقاس من الكتاب المقدس ومش من حتة تانية اوعى
تخالف تعاليمه و اعبد ربنا بعد كدا بالطريقة اللى تريحك !
تعليقات
إرسال تعليق